Pas 3 ditësh intensive me zjarr masiv në Bashkinë Devoll, u arrit më në fund shuarja përfundimtare e tij. Aktualisht, situata po mbahet nën monitorim nga forcat zjarrfikëse.
Dua të shpreh mirënjohjen time më të thellë për të gjitha strukturat që u angazhuan pa rezerva në përballimin e kësaj situate të vështirë, që nga momenti i parë deri në shuarjen e fundit të flakëve.
Mirënjohje maksimale për të gjithë djemtë e forcave të MZSH të Bashkive Devoll, Korçë, Maliq dhe Pustec, të cilët qëndruan për rreth 70 orë pa pushim, mes temperaturave të larta dhe terrenit të vështirë.
Falënderim për forcat zjarrfikëse të shtetit fqinj Greqi, të cilat erdhën në ndihmë të forcave tona zjarrfikëse.
Një falënderim i veçantë për të gjithë punonjësit e tjerë të Bashkisë Devoll, Drejtorisë së Pyjeve dhe Drejtorisë së Shërbimeve Publike, Policinë Kufitare dhe të rendit si dhe çdo institucion tjetër për angazhimin maksimal në shuarjen e zjarrit.
Falënderoj deputetin e zgjedhur të Partisë Socialiste, Genti Lakollari, i cili u angazhua drejtpërdrejt në këtë situate zjarri.
Thirrje për çdo qytetar:
Në këto ditë të nxehta, shmangni çdo lloj ndezjeje zjarri në natyrë!
Edhe nëse mendoni se mund ta kontrolloni, rreziku është i jashtëzakonshëm dhe pasojat janë të rënda për njerëzit, pyjet dhe kafshët!
