Galeria e Arteve Dixhitale në Korçë u mbush me tingujt e muzikës baroke spanjolle në mbrëmjen e së premtes, në kuadër të edicionit të 18-të të Festivalit Ndërkombëtar të Muzikës Baroke “Vox Baroque”.
Koncerti me titull “Amor, Fey Locura” (Dashuri, Besim dhe Çmenduri) solli në skenë artistet spanjolle Susanna Crespo Held, mezzo-soprano, dhe Amaya Fernández Pozuelo në klaviçembal, të shoqëruara nga balerinë dhe një aktore. Performanca ndërthuri muzikën, interpretimin skenik dhe vallëzimin, duke rikrijuar atmosferën e epokës baroke.
Artistët u shprehën të emocionuar për koncertin e tyre të parë në Shqipëri, duke theksuar se programi artistik trajton temat universale të dashurisë, besimit dhe shpresës, të cilat kanë frymëzuar krijuesit ndër shekuj.
Drejtori i festivalit, Jusuf Beshiri, bëri të ditur se koncerti i kushtohej 35-vjetorit të emigrimit masiv të shqiptarëve në vitin 1991. Sipas tij, përmes ndërthurjes së muzikës baroke, vallëzimit dhe interpretimit skenik u sollën në kujtesë dy valët më të mëdha të emigrimit shqiptar, si një homazh për të gjithë ata që e kanë përjetuar këtë histori.
Koncerti u mirëprit dhe u duartrokit gjatë nga publiku korçar, ndërsa festivali “Vox Baroque” vijon të sjellë në qytet artistë ndërkombëtarë, duke forcuar rolin e Korçës si një qendër e rëndësishme e muzikës klasike dhe baroke në rajon.
