Bashkia Pogradec ka ndërmarrë një nismë të gjerë për krijimin e hapësirave publike në fshatrat më të thellë të territorit, përfshirë edhe zonën e Mokrrës. Qëllimi i kësaj nisme është të ofrohen kënde lojrash për fëmijët, hapësira pushimi për moshat e treta dhe fusha sportive për të rinjtë, duke sjellë më shumë jetë dhe gjallëri në çdo komunitet rural.
Një prej projekteve më të reja po realizohet në fshatin Velçan, ku po përfundon ndërtimi i qendrës së hapur multifunksionale. Edhe pse puna vazhdon, këndi i lodrave për fëmijët është tashmë gati dhe i përdorshëm, duke u kthyer menjëherë në vendin më të dashur për të vegjlit.
“Fëmijët nuk kanë humbur kohë për të luajtur. Ti gëzoni!”, – thuhet në njoftimin e Bashkisë Pogradec.
Në përfundim të punimeve, qendra e Velçanit do të shërbejë si një hapësirë shplodhëse dhe argëtuese për të gjitha moshat, e pajisur me kënde lojrash, vende pushimi për të moshuarit dhe fushë futbolli që do të nxisë aktivitetin fizik dhe jetën komunitare.
Ky projekt është pjesë e vizionit të Bashkisë Pogradec për zhvillimin e barabartë të fshatrave, duke sjellë kushte më të mira jetese, më shumë gjallëri dhe një mjedis më të bukur për banorët e zonave rurale.
