Erseka u mbush me ngjyra, buzëqeshje dhe emocion teksa maturantët e vitit 2025 kaluan në tapetin e kuq, duke shënuar përmbylljen e një kapitulli të rëndësishëm në jetën e tyre. Qyteti ishte në festë për nder të të rinjve që nisin tashmë një rrugëtim të ri drejt ëndrrave të tyre.
Në një atmosferë plot gëzim, përveç paraqitjes së maturantëve, nuk munguan as fjalët e urimit dhe përkrahjes. Kryetari i Bashkisë Kolonjë, në një fjalë të ngrohtë drejtuar të rinjve, i uroi për sukses në çdo hap që do të ndërmarrin në të ardhmen. Ai u kujtoi se Kolonja do të mbetet gjithmonë vendi që do t’u thërrasë dhe do t’i mirëpresë, kudo që jeta t’i çojë.
Në shenjë simbolike, çdo maturant mori si dhuratë një libër me thënie për jetën – një mesazh frymëzimi për të ecur përpara me mençuri, guxim dhe vlera.
Edhe drejtoresha e gjimnazit “Petro Nini Luarasi” i përshëndeti maturantët me urime të përzemërta, duke i inkurajuar të mos ndalen përpara asnjë sfide dhe të jenë përfaqësues të denjë të dijes dhe qytetarisë që ka karakterizuar gjithmonë Kolonjën.
Matura 2025 në Ersekë nuk ishte thjesht një festë, por një dëshmi e krenarisë lokale dhe e besimit që komuniteti ka tek brezi i ri.
