Për të gjashtin vit radhazi, Maratona e Notit “Agron Ruvina” ka mbledhur në Pogradec mbi 100 sportistë të të gjitha moshave, nga katër shtete të rajonit.
Gara u zhvillua në tre disiplina: 200 metra për fëmijë, 200 metra për veteranë dhe 1100 metra për profesionistë.
Në garën e profesionistëve, kampione u shpall Lizi Gusho. Notarja pogradecare, e cila jeton në Shtetet e Bashkuara të Amerikës dhe kishte ardhur posaçërisht për këtë aktivitet, arriti të shkëputej që në nisje, duke lënë pas konkurrentët e tjerë.
Një nga momentet më të veçanta të maratonës ishte gara e veteranëve. Ish-sportistë, të cilët e kanë njohur Agron Ruvinën dhe kanë ndjekur nga afër sukseset e tij, garuan në kujtim të rekordmenit pogradecar.
Pjesë e aktivitetit ishin edhe shtetas të huaj. Alice Taylor, një amerikane që prej disa vitesh jeton në Shqipëri, vlerësoi organizimin e maratonës, duke u shprehur se aktivitete të tilla e bëjnë Pogradecin edhe më të bukur.
Për vëllain e Agron Ruvinës, fakti që qyteti vijon të nderojë figurën dhe kontributin e rekordmenit të notit është një burim i madh krenarie.
Përtej garës sportive, Maratona “Agron Ruvina” synon të mbajë gjallë kujtimin e një prej figurave të rëndësishme të notit pogradecar, por edhe të promovojë këtë sport dhe të afrojë gjithnjë e më shumë të rinj me notin.
Edhe këtë vit, numri i pjesëmarrësve konfirmoi rritjen e interesit për aktivitetin, i cili tashmë është kthyer në një nga eventet sportive tradicionale të verës në Pogradec.
