Në një kohë kur fjala e lirë shpesh zbehet nga interesat politike, Leonard Olli mbetet një figurë që i qëndroi stoik parimit të tij themelor: të thotë të vërtetën, pa frikë dhe pa kompromis. Ai nuk u step as kur kjo do të thoshte të dilte kundër figurave kryesore të partisë së tij. Fillimisht, nuk ngurroi të kritikonte Lulzim Bashën kur mendonte se po dëmtonte Partinë Demokratike. Më pas, me të njëjtën qartësi dhe ndershmëri, nuk hezitoi të shprehej edhe ndaj Sali Berishës.
Për Leonard Ollin, politika nuk ishte terren për akuza të pamenduara, por përballje me fakte dhe argumente. Edhe gjatë fushatës në qarkun e Korçës, ku ishte kandidat për deputet i PD-së në vitin 2013, ai e trajtoi debatin politik si një arenë të ideve dhe jo si një betejë baltosjeje.
I lindur në Korçë më 25 tetor 1965, Olli ka ndërtuar një karrierë të pasur që bashkon botën e gazetarisë, akademisë dhe politikës. Pas përfundimit të studimeve në Gjuhë Frënge dhe disa viteve si mësues, ai emigroi në Greqi, ku fitoi përvojë në fusha të ndryshme. Me rikthimin në Shqipëri, iu përkushtua gazetarisë – nga TV Kristal e Gazeta Panorama, tek TV Klan e revista Kult – duke u dalluar për profesionalizmin e tij. Gjithshtu ka qenë she pjesë e redaksisë së gazetës “Metropol”.
Për më shumë se gjashtë vite, ai mbajti poste kyçe në administratën e lartë shtetërore, përfshirë atë të zëdhënësit të Komisionit Qendror të Zgjedhjeve, drejtorit të Marrëdhënieve me Publikun në Ministrinë e Mbrojtjes dhe këshilltarit të Ministrit të Brendshëm. Raportimet e tij live nga KQZ mbahen mend për qartësinë dhe paanshmërinë.
Me një Master Shkencor në Marrëdhënie Ndërkombëtare (2009-2012) nga Universiteti i Tiranës dhe kualifikime në fushën e çështjeve zgjedhore e komunikimit publik, Olli ka qenë pedagog në Universitetin “Fan Noli” të Korçës dhe pranë Shkollës së Lartë “Marin Barleti” në Tiranë. Ai flet rrjedhshëm frëngjisht, greqisht, anglisht dhe italisht, duke sjellë një horizont të gjerë kulturor e profesional në çdo rol që merr përsipër.
Figura e Leonard Ollit mbetet një kujtesë e gjallë se në politikë dhe media ka ende zëra që nuk përkulen, që nuk e shesin të vërtetën dhe që besojnë se respekti për publikun nis me respektin për faktin.
