- Specialistët për Hetimin e Krimeve të DVKM Korçë referuan materialet në Prokurori, ku nisi procedimi penal për shtetasin F. N., 49 vjeç, banues në Korçë, për veprën penale “Kalimi i paligjshëm i kufirit shtetëror”, pasi dyshohet se ka kaluar ilegalisht në Maqedoninë e Veriut.
Ndërkohë, Specialistët për Hetimin e Narkotikëve referuan materialet në Prokurori dhe nisën procedimin penal për shtetasin S. G., 22 vjeç, banues në Pogradec. Gjatë kontrollit të ushtruar në lokalin e tij, në lagjen nr. 2, Pogradec, u gjet dhe u sekuestrua në cilësinë e provës materiale një sasi e vogël lënde e dyshuar narkotike Cannabis Sativa, si dhe një peshore elektronike.
Gjithashtu, Specialistët për Hetimin e Krimeve të Komisariatit të Policisë Korçë referuan materialet në Prokurori për 4 shtetas të mitur, banues në fshatin Goskovë, Korçë, për veprën penale “Plagosja e lehtë me dashje”, kryer në bashkëpunim. Ata dyshohet se, në fshatin Porodinë, janë konfliktuar fizikisht me një 16-vjeçar, banues në Korçë, për motive të dobëta.
Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Korçë / Informacion paraprak
Sot, rreth orës 13:45, në lagjen nr. 9, Korçë, në banesën e tij, është gjetur i pajetë shtetasi K. K., 71 vjeç, i cili dyshohet se është vetëvarur. Nga këqyrja e jashtme e trupit nuk janë konstatuar shenja dhune.
Grupi hetimor po punon për sqarimin e plotë të rrethanave të kësaj ngjarjeje.
