Një aksion i Komisariatit të Policisë Korçë, i zhvilluar mbrëmjen e djeshme, ka çuar në arrestimin e një 31-vjeçari.
Gjatë një kontrolli të ushtruar në një lokal të qytetit, shërbimet e policisë konstatuan se shtetasi mbante armë zjarri pa leje. Në pranga u vu Andi Qeraxhi, 31 vjeç, banues në Korçë.
Sipas burimeve zyrtare, i arrestuari është një emër i njohur për policinë për shkak të precedentëve penalë. Ai dyshohet se ka qenë i përfshirë në disa ngjarje kriminale, ndërsa në vitin 2017 akuzohet se ka qëlluar me armë zjarri të tipit kallashnikov drejt një lokali nate në periferi të qytetit të Korçës.
Gjithashtu, 31-vjeçari dyshohet se është i përfshirë edhe në veprimtari të paligjshme të trafikimit të lëndëve narkotike.
Materialet procedurale i janë referuar Prokurorisë së Korçës për veprime të mëtejshme ligjore, ndërsa policia vijon hetimet për dokumentimin e plotë të rastit.
