Drejtoria Vendore e Policisë Korçë njofton se, në vijim të ngjarjeve të ditëve të fundit, janë kryer arrestime, procedime penale dhe sekuestrime provash materiale në disa qytete të qarkut.
Në lidhje me konfliktin fizik të ndodhur më 19.01.2026 në lagjen nr. 3, Pogradec, shërbimet e Komisariatit të Policisë Pogradec kapën shtetasin K. N., 37 vjeç, i shpallur më parë në kërkim. Pas konsultimit me Prokurorin, u vendos që ai të hetohet në gjendje të lirë për veprën penale “Plagosja e lehtë me dashje”, kryer në bashkëpunim.
Ndërkohë, specialistët për Hetimin e Krimeve në Komisariatin e Policisë Korçë arrestuan në flagrancë shtetasin V. Th., 40 vjeç, banues në Korçë, i cili u kap duke vjedhur vegla pune në banesën e një shtetasi në lagjen nr. 2. Sendet e vjedhura u sekuestruan si prova materiale.
Po ashtu, u referuan materialet në Prokurori për shtetasen E. C., 41 vjeçe, banuese në Korçë, e dyshuar për veprën penale “Mashtrimi”, pasi dyshohet se i ka marrë një shumë parash një shtetasi dhe nuk ia ka kthyer.
Specialistët për Hetimin e Narkotikëve nisën procedim penal për shtetasin E. B., 25 vjeç, si dhe shpallën në kërkim R. B., 24 vjeç, të dy banues në Maliq. Gjatë kontrollit në lokalin që kishin në përdorim, u gjet një sasi e vogël lënde e dyshuar narkotike cannabis sativa dhe një fenelinë si ato të Policisë. Nga verifikimet rezultoi se subjekti nuk ishte i regjistruar në organet tatimore.
Në fushën e qarkullimit rrugor, nisi procedim penal për:
- R. M., 33 vjeç, banues në Pogradec, i cili aksidentoi një këmbësor 69-vjeçar, jashtë rrezikut për jetën;
- një 17-vjeçar nga Korça, që drejtonte automjetin pa leje dhe nuk iu bind urdhrit të Policisë për ndalim.
Gjithashtu, Komisariati i Policisë Maliq nisi procedim penal për S. H., 24 vjeç, i cili dyshohet se ka prishur qetësinë publike duke xhiruar gomat e automjetit dhe nuk iu bind Policisë.
Në Ersekë, u proceduan penalisht R. M., 40 vjeç dhe E. Sh., 40 vjeç, pas një konflikti fizik mes tyre. Gjatë kontrollit, njërit prej tyre iu gjet dhe sekuestrua një mjet prerës (thikë).
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
