Në Korçë ka nisur mbledhja e firmave për një peticion që synon t’i kërkojë Parlamentit shqiptar ndryshime në ligjin për trajtimin e fëmijëve me sëmundje të rënda, të cilat nuk mund të kurohen në Shqipëri.
Nisma ka gjetur mbështetje të gjerë nga qytetarët korçarë, të cilët e konsiderojnë si detyrim të shtetit financimin e trajtimeve mjekësore për fëmijët nga 0 deri në 18 vjeç. Sipas tyre, familjet nuk duhet të mbështeten vetëm te fondacionet humanitare apo bamirësia publike për raste jetike.
Qytetarët shprehen se kjo është një kauzë që prek gjithë shoqërinë dhe se raste të tilla mund t’i ndodhin kujtdo, ndaj kërkojnë ndërhyrje të drejtpërdrejtë dhe të garantuar nga shteti.
Një nga organizatorët e nismës, Klajdi Pllaha, bën me dije se për dërgimin e peticionit në Parlament nevojiten rreth 20 mijë firma, ndërsa deri më tani janë mbledhur rreth 4 mijë. Ai thekson se iniciativa, e nisur në Korçë, do të shtrihet në të gjithë Shqipërinë.
Kjo nismë erdhi pas një rasti të një foshnje në Korçë, familja e së cilës nuk kishte mundësi financiare për trajtimin jashtë vendit. Ndihma u sigurua përmes fondacioneve, por rasti nxiti reagim qytetar për të kërkuar që shteti të marrë përgjegjësi të plotë në situata të tilla.
