Sipas të dhënave të publikuara nga INSTAT, Korça ka humbur 312 biznese vetëm gjatë vitit të fundit. Këto shifra shqetësuese janë bërë publike nga këshilltari i Partisë Demokratike në Këshillin Bashkiak, Devis Osman, i cili rendit një sërë arsyesh që sipas tij kanë çuar në këtë situatë alarmante për ekonominë lokale.
Sipas Osmanit, emigrimi masiv ka sjellë një rënie të ndjeshme të popullsisë dhe fuqisë blerëse, duke ndikuar drejtpërdrejt në uljen e konsumit dhe të ardhurave të bizneseve. Ai përmend gjithashtu konkurrencën e pandershme dhe klientelizmin si faktorë që po mbyllin biznese të ndershme në mungesë të përkrahjes.
“Korça është i vetmi qytet në juglindje që për të shkuar në Tiranë të duhen 3-4 orë, kostot e mirëmbajtjes janë të larta, dhe infrastruktura në zonat industriale është thuajse inekzistente”, shprehet Osman.
Ndër të tjera, ai thekson mungesën e energjisë dhe efektivitetit në menaxhimin e qytetit nga ana e Bashkisë, duke kritikuar fokusin e tepruar te organizimi i festave që, sipas tij, nuk kanë efekt pozitiv në zhvillimin ekonomik.
Këshilltari i PD propozon disa zgjidhje konkrete si: heqja e tarifave për bizneset e reja për 1-2 vitet e para, programe trajnimi, mbështetje për bizneset familjare dhe krijimi i platformave të bashkëpunimit mes komunitetit dhe sipërmarrësve. Sipas tij, është jetike të ndalet braktisja e qytetit nga të rinjtë dhe të krijohen kushte që i nxisin të qëndrojnë.
