Komuniteti maqedonas nga Prespa në Kanada i ka drejtuar një letër zyrtare Qeverisë së Republikës së Shqipërisë, në të cilën shpreh shqetësim të thellë lidhur me vendimin për hapjen e tre qendrave pritëse për migrantë në territorin e Bashkisë Pustec dhe kërkon tërheqjen e menjëhershme të këtij vendimi.
Në letër theksohet se pas vitit 1991, disa qindra maqedonas me origjinë nga Bashkia Pustec janë vendosur në Kanada, të cilët, pavarësisht largësisë fizike, kanë mbetur të lidhur ngushtë me vendlindjen. Ata kanë mbështetur vazhdimisht komunitetin lokal maqedonas përmes ndihmës për familjet, si dhe përmes përkrahjes së aktiviteteve kulturore, sociale dhe zhvillimore.
Nga komuniteti theksojnë se vitet e fundit një pjesë e anëtarëve po shqyrtojnë seriozisht kthimin në vendlindje dhe investimin në Bashkinë Pustec, veçanërisht në sektorin e turizmit, duke e parë Prespën si një rajon me potencial të madh për turizëm të qëndrueshëm dhe zhvillim ekonomik lokal. Pikërisht për këtë arsye, vendimi për hapjen e qendrave pritëse për migrantë në Bashkinë Pustec vlerësohet si i dëmshëm dhe shqetësues.
Sipas tyre, një hap i tillë mund të ketë pasoja serioze dhe afatgjata, duke cenuar kompaktësinë e popullsisë maqedonase, duke rritur ndjenjën e pasigurisë dhe duke nxitur emigrimin e mëtejshëm të banorëve të mbetur në këtë zonë. Për më tepër, thuhet se ky vendim e dëmton rëndë çdo perspektivë reale për zhvillim turistik dhe ekonomik të rajonit.
Komuniteti maqedonas nga Prespa në Kanada shpreh gjithashtu mbështetje të plotë për nismën e partisë Aleanca e Maqedonasve për Integrimin Europian (AMIE), e cila e ka ankimuar këtë vendim të qeverisë shqiptare pranë gjykatës kompetente në Tiranë, me qëllim mbrojtjen e të drejtave dhe interesave të komunitetit maqedonas në Bashkinë Pustec.
Në pjesën përmbyllëse të letrës, komuniteti i bën thirrje Qeverisë së Republikës së Shqipërisë të tërhiqet nga vendimi për hapjen e qendrave pritëse për migrantë në Pustec dhe, në vend të kësaj, të përqendrohet në investime për zhvillimin e Bashkisë Pustec, përmirësimin e infrastrukturës, mbështetjen e turizmit dhe krijimin e kushteve për kthimin dhe investimin e emigrantëve në vendlindjen e tyre.
“Vetëm përmes dialogut, respektimit të të drejtave të pakicave kombëtare dhe zhvillimit të qëndrueshëm mund të sigurohet një e ardhme e qëndrueshme dhe evropiane për rajonin e Prespës”, thuhet në letrën e nënshkruar nga Komuniteti Maqedonas nga Prespa në Kanada.
