Në Ditën e Dëshmorëve, homazhe dhe ceremoni përkujtimore janë zhvilluar edhe në Kolonjë, ku përfaqësues të pushtetit lokal, familjarë të dëshmorëve dhe qytetarë kanë vendosur kurora me lule pranë bustit dhe varreve të Dëshmorëve, duke nderuar sakrificën e tyre për lirinë e vendit.
Gjatë ceremonisë zyrtare, Kryetari i LANC Kolonjë, Jani Dhimitri, theksoi se liria e kombit shqiptar nuk është dhuruar, por është fituar me gjakun dhe sakrificën e shumë burrave dhe grave, mes të cilëve një kontribut të veçantë kanë dhënë edhe Dëshmorët e Kolonjës.
Në fjalën e tij përshëndetëse, kryetari i Bashkisë Kolonjë, Erion Isai, kujtoi me respekt disa prej figurave të rëna për atdheun, ndërsa vlerësoi edhe praninë e disa grave nga Kosova, bashkëshortët e të cilave dhanë jetën në emër të lirisë, duke e kthyer këtë ditë në një simbol bashkimi dhe respekti mbarëkombëtar.
Ceremonitë u zhvilluan mes emocioneve dhe mesazheve për ruajtjen e kujtesës historike, duke përcjellë te brezat e rinj rëndësinë e sakrificës për liri.
Homazhe në kuadër të 5 Majit, Ditës së Dëshmorëve, janë mbajtur edhe në Korçë dhe Pogradec, ku institucione vendore, familjarë dhe qytetarë kanë përkujtuar të rënët për atdheun.
