Mirë se vini në Kolonjë, një perlë e natyrës mbështjellë nga hijeshia malore, qetësia alpine dhe kultura e rrënjosur thellë në tabanin e kësaj krahine vendosur në këmbë të Gramozit.
E fshehur mes majave të larta dhe luginave mbresëlënëse, zemra e juglindjes ofron më shumë se thjesht një arratisje nga përditshmëria: Ofron frymëmarrje!
Nëse po planifikoni një udhëtim të paharruar drejt natyrës së paprekur dhe mikpritjes së vërtetë, atëherë bëni gati çantën e aventurës për të shkuar 1,050 metra mbi nivelin e detit.
Për të mbërritur në destinacionet e preferuara, ftesa e arratisjes ju detyron të rrugëtoni mes Ersekës që është qyteti simbol i krahinës, livadheve alpine, pyjeve të dendur, vargmaleve të njëpasnjëshme dhe kurorës së pemëve që ofrojnë një freski që ndjehet në çdo frymëmarrje.
Nëse nuk keni parë Pllajën e Kolonjës nuk keni parë asgjë.
Ky qilim i gjelbër përreth qytetit, krijon një kontrast mahnitës me majat e thepisura që e rrethojnë, duke e bërë Ersekën një peizazh të gjallë dhe autentik.
E gjithë kjo, e bën këtë zonë parajsë të ecjes në shtigjet e pashkelura, të kampingjeve verore, të ngjitjeve malore dhe eksplorimeve natyrore, veçanërisht në Parkun Natyror të Gërmenj-Shelegurit, një ndër ekosistemet më të ruajtura në Shqipëri.
Gjatë muajve të verës, Kolonja bëhet një strehë ideale për ata që kërkojnë freski, natyrë të virgjër dhe shije të pastra lokale, që nga mjalti e çajrat e egër, deri te bulmeti bio dhe gatimet tradicionale që ruhen me përkushtim brez pas brezi.
Me rrugicat e pastra, shtëpitë karakteristike prej guri dhe një ndjesi të thellë komuniteti, Erseka të fton të ndalosh për pak… të ngadalësosh ritmin… dhe të ndjesh paqen që vetëm kjo zone mund ta ofrojë.
