Në skenën e Teatrit “Andon Zako Çajupi” në Korçë, u shfaq muzikalja “Katedraja”, një nga produksionet më ambicioze teatrore të këtij sezoni artistik.
Shfaqja solli për publikun një ndërthurje të fuqishme mes artit skenik, muzikës dhe kërcimit, duke përcjellë emocione të forta dhe duke mbajtur të angazhuar artdashësit gjatë gjithë kohëzgjatjes së saj.
“Katedraja” u ngjit në skenë nën regjinë e Xhuliano Briskut, me koreografi nga Artan Ibershimi, udhëheqje muzikore nga Artur Vera dhe orkestrime nga Laert Qazimi.
Produksioni mbështetet në një kast të gjerë artistësh, ku spikasin Arsi Bako, Amri Hasanlliu, Gerald Murrja, Donald Shehu, Mateus Frroku dhe Gloria Nure, të cilët sollën në jetë personazhe të ndërlikuar dhe emocionalë.
Pas shfaqjes, aktorët ndanë përshtypjet e tyre për këtë sfidë artistike.
Amri Hasanlliu, në rolin e Kazimondos, u shpreh se përjetimi ishte i lodhshëm, por shumë emocionues:
“I lodhur, por mirë. Ishte një emocion dhe sfidë shumë e madhe. Roli më i vështirë që kam pasur ndonjëherë, veçanërisht për vokalin, por besoj se u prit shumë mirë nga publiku.”
Gerald Murrja, që interpretoi Kapitenin, theksoi rëndësinë e këtij produksioni për teatrin korçar:
“Besoj se në Korçë është një nga muzikalet e para që vendoset në teatër. Ishte vetëm nata e parë dhe pritja e publikut ishte shumë e mirë. Ka qenë e vështirë të përshtatem, por ja dolëm me sukses.”
Ndërsa Arsi Bako, në rolin e Esmeraldës, e cilësoi shfaqjen si një eksperiencë të veçantë:
“Ishte një eksperiencë ndryshe nga ato që kam pasur më parë. Bashkimi i aktrimit, këndimit dhe kërcimit ishte sfidues, por shpresoj ta kem kaluar me sukses. Do të mbetet gjatë në karrierën time.”
Regjisori Xhuliano Brisku u shpreh i kënaqur me rezultatin final, duke e quajtur shfaqjen një sfidë të madhe artistike:
“Ishte një çmenduri dhe një provokim i madh për mua si regjisor i ri. Muzikali është një gjini shumë e vështirë, por besoj se ja dolëm të gjithë së bashku.”
Në përfundim të shfaqjes, “Katedraja” u duartrokit gjatë nga publiku korçar, duke konfirmuar vlerat artistike dhe impaktin emocional që kjo vepër përcolli në skenën e teatrit të qytetit.
