Josif Laçka, i njohur ndryshe si “Cifi”, është një prej figurave më të njohura në qytetin e Pogradecit. Me 47 vite përvojë si kamarier, ai mban titullin e kamarierit më të vjetër në qytet dhe rrëfen me krenari rrugëtimin e tij që nisi në vitin 1978 në hotel “Turizmi”.
Pas eksperiencës në “Turizmin”, ai vazhdoi punën në kompleksin e njohur të Drilonit, më pas si mësues në shkollën profesionale, ku u mësonte të rinjve për hoteleri dhe turizëm, ndërsa 17 vitet e fundit i kaloi në restorantin tradicional “Bimbli”, një nga pikat më të frekuentuara buzë liqenit.
Në një nga kujtimet më të veçanta të karrierës së tij, Cifi kthehet pas në vitin 1988, kur ish-udhëheqësi i atëhershëm i Shqipërisë, Ramiz Alia, vizitoi Pogradecin. Gjatë drekës zyrtare, Cifi i shërbeu një Koran të madh dhe të gatuar në mënyrë perfekte, një nga specialitetet më të njohura të zonës.
Por, ndryshe nga sa pritej, Ramiz Alia nuk e preku fare peshkun. Arsyeja? “Ishte një verë e thatë dhe me shumë probleme për vendin. Në shenjë mirënjohjeje për punën tonë dhe sakrificat e personelit shërbyes, ai vendosi që koranin ta hanim ne. Ishte një gjest simbolik, por që na la mbresa të mëdha,” kujton Cifi.
Sot, ai vazhdon të jetë një figurë e respektuar në Pogradec, jo vetëm për përvojën e tij të gjatë, por edhe për përkushtimin ndaj mikpritjes dhe kujdesin për traditat kulinare të qytetit buzë liqenit.
