Drejtoria Vendore e Policisë Korçë ka raportuar disa raste të evidentuara gjatë 24 orëve të fundit, që lidhen me shkelje të qarkullimit rrugor, mashtrim, ndërtime të paligjshme dhe dëmtime prone.
Specialistët e Sektorit të Qarkullimit Rrugor arrestuan në flagrancë shtetasin A. A., 63 vjeç, banues në fshatin Vashtëmi, Maliq, pasi u kap në qytetin e Korçës duke drejtuar automjetin në gjendje të dehur.
Ndërkohë, Specialistët për Hetimin e Krimeve të Komisariatit të Policisë Korçë shpallën në kërkim shtetasin I. T., 37 vjeç, banues në Korçë, i dyshuar për mashtrim, pasi dyshohet se i ka marrë një shumë parash një shtetaseje dhe nuk ia ka kthyer. Po punohet për kapjen e tij.
Në Pogradec, u referuan materialet në Prokurori për shtetasin G. Th., 45 vjeç, për veprën penale “Ndërtimi i paligjshëm”, pasi dyshohet se në fshatin Podgozhan ka kryer punime ndërtimi në tejkalim të lejes. Gjithashtu, nisi procedimi penal për shtetasin A. Th., 54 vjeç, për “Shkatërrim të pronës nga pakujdesia”, pasi duke drejtuar një kamion që kishte pësuar defekt, ka dëmtuar murin e një banese në këtë fshat.
Po ashtu, në Komisariatin e Policisë Devoll është depozituar një kallëzim nga një punonjëse sociale e bashkisë Devoll, e cila ka bërë me dije se prej rreth 20 ditësh është larguar nga banesa ku ishte strehuar një 26-vjeçar nga Bilishti, i cili vuan nga probleme të shëndetit mendor. Policia po punon për gjetjen e tij.
Materialet procedurale i janë referuar Prokurorisë së Korçës për veprime të mëtejshme.
