Një tjetër sukses vjen nga zemra e jugut! Ekipi i volejbollit të gjimnazisteve të Himarës ka rrëmbyer trofeun e Edicionit të 3-të të Kampionatit Kombëtar të Ekipeve Sportive në Shkolla, duke u shpallur kampion në rang kombëtar dhe duke përfaqësuar me krenari Qarkun e Vlorës.
Nën drejtimin e trajnerit të përkushtuar, Niqiforo Konomi, vajzat kanë treguar përkushtim, disiplinë dhe pasion për sportin, duke arritur një rezultat mbresëlënës që është fryt i punës së palodhur dhe bashkëpunimit të ngushtë me Bashkinë Himarë.
Ky sukses është dëshmi se kur të rinjtë kanë mbështetje institucionale, ata mund të arrijnë majat. Bashkia Himarë ka qenë dhe mbetet një aleat i fortë i sportit, duke investuar jo vetëm në aktivitete fizike, por edhe në zhvillimin personal e profesional të brezit të ri.
Ky rezultat na motivon të vijojmë më tej me përkushtim mbështetjen për çdo të ri e të re të talentuar, në sport apo art, duke i kthyer këto angazhime në ura promovimi për Himarën – një qytet që tashmë po afirmohet jo vetëm si destinacion turistik, por edhe si qendër e vitalitetit rinor dhe sportiv në Shqipëri.
Kampionati është themeluar nga Ministria e Arsimit dhe Sportit në bashkëpunim me Komitetin Olimpik Kombëtar Shqiptar dhe ka përfshirë mijëra të rinj nga shkollat e vendit, në një atmosferë garuese, bashkëpunuese dhe frymëzuese.
