Ministri i Drejtësisë, Toni Gogu, zhvilloi një vizitë në Institucionin e Ekzekutimit të Vendimeve Penale në Pojskë, në kuadër të 1 Qershorit, Ditës Ndërkombëtare të Fëmijëve. Gjatë vizitës, ai u ndal te politikat e reja të drejtësisë penale, situata në burgje dhe nevoja për zgjerimin e përdorimit të masave alternative ndaj arrestit.
Gogu bëri me dije se projektligji për amnistinë pritet të diskutohet së shpejti në Kuvend, duke e cilësuar atë si një instrument të politikës penale me karakter njerëzor, që synon jo vetëm ndëshkimin e veprave penale, por edhe rehabilitimin dhe rikthimin e dinjitetit për kategoritë më të ndjeshme të shoqërisë.
Ministri ngriti shqetësimin për numrin e lartë të personave në paraburgim, i cili aktualisht tejkalon numrin e të dënuarve në sistemin penitenciar. Sipas tij, kjo është një çështje e evidentuar edhe në raportet e Këshillit të Europës dhe kërkon ndërhyrje si nga gjyqësori, ashtu edhe nga institucionet e drejtësisë.
Një tjetër fokus i reformës është rikthimi i mbikëqyrjes elektronike, e cila prej disa vitesh nuk funksionon. Ministri theksoi se po punohet që kjo masë të vihet sërish në dispozicion të gjykatave si një alternativë ndaj arrestit, duke mundësuar vendime më proporcionale dhe të arsyetuara.
Sipas Gogut, këto ndryshime synojnë uljen e numrit të paraburgosurve dhe afrimin e sistemit shqiptar të drejtësisë me standardet europiane. Në përfundim të vizitës, ai vuri theksin te rëndësia e rehabilitimit dhe riintegrimit të të dënuarve në shoqëri me dinjitet të plotë.
