Fermerët e fushës së Maliqit kanë protestuar ditën e sotme përpara Bashkisë Maliq, duke ngritur shqetësimin për përmbytjet e shkaktuara nga reshjet e shumta të ditëve të fundit. Sipas tyre, përmbytjet kanë dëmtuar rëndë prodhimet bujqësore, duke shkaktuar dëme të mëdha dhe në shumë raste të parikuperueshme.
Një tjetër arsye e protestës është mungesa e subvencioneve dhe e naftës për bujqësinë, një problem që, sipas fermerëve, mbetet ende i pazgjidhur. Ata theksojnë se vështirësitë janë edhe më të mëdha për fermerët potencialë që kanë marrë toka me qira, për shkak të mosmarrëveshjeve me qeradhënësit dhe mungesës së mbështetjes financiare.
“Përmbytjet na kanë shkatërruar të mbjellat. Pa subvencione dhe pa naftë, është e pamundur të vazhdojmë punën. Jemi drejt falimentimit.”
Nga reshjet e muajve nëntor dhe janar, vetëm në fushën e Maliqit janë përmbytur rreth 4 000 hektarë tokë bujqësore, ndërsa afro 2 500 hektarë vijojnë ende të jenë nën ujë.
Nga ana tjetër, Bashkia e Maliqit, në bashkëpunim me Drejtorinë e Ekstensionit Bujqësor, ka ngritur grupet e verifikimit në terren për evidentimin e dëmeve dhe procedurat e dëmshpërblimit për fermerët e prekur.
Fermerët kërkojnë zgjidhje të menjëhershme dhe mbështetje konkrete, duke paralajmëruar se protestat do të vijojnë nëse kërkesat e tyre nuk merren parasysh.
