Etno Kids Festival në Rehovë të Kolonjës
Në fshatin piktoresk të Rehovës në Kolonjë, është zhvilluar “Etno Kids Festival”, një aktivitet që solli ngjyra, muzikë dhe traditë nga e gjithë Shqipëria.
Qindra fëmijë nga rrethe të ndryshme të vendit janë veshur me kostumet shumëngjyrëshe tradicionale të zonave të tyre dhe kanë performuar valle popullore.
Arjan Sukniqi, koreograf i njohur, thotë se ky festival është dëshmi se dashuria e fëmijëve për trashëgiminë kulturore po rritet çdo vit e më shumë.
Edhe Anila Mertiri, kostumografe nga Myzeqeja, prej 19 vitesh ruan dhe përcjell traditën përmes punës së saj. Ajo tregon se interesi i fëmijëve për veshjet popullore është në rritje, ndërsa Agron Kordalli nga Devolli thekson se numri i fëmijëve që ndjekin kurset e valleve tradicionale është më i madh se kurrë.
Kryetari i Bashkisë Kolonjë, Erion Isai, ka përshëndetur organizimin, duke theksuar se Rehova po kthehet në një nga polet më të rëndësishme turistike dhe kulturore të Kolonjës, ku tradita takon brezat e rinj.
Etno Kids Festival në Rehovë dëshmoi se trashëgimia kulturore shqiptare po jeton përmes brezit më të vogël, duke kërkuar të mbajë gjallë traditat e zakonet e vendit tonë
