Policia e Korçës ka vijuar kontrollet dhe veprimet ligjore në të gjithë territorin e qarkut, duke referuar disa raste në Prokurori, si dhe duke kryer arrestime në flagrancë.
Specialistët për Hetimin e Narkotikëve referuan materialet në Prokurori, ku nisi procedimi penal për shtetasit A. M., 30 vjeç dhe M. B., 32 vjeç, banues në fshatin Burimas. Gjatë kontrollit në automjetin me drejtues M. B. dhe pasagjer A. M., u gjet një sasi lënde e dyshuar narkotike kanabis. Më pas, gjatë kontrollit në banesën e 32-vjeçarit, u gjet një tjetër sasi e së njëjtës lëndë, e cila u sekuestrua në cilësinë e provës materiale.
Shërbimet e Sektorit të Qarkullimit Rrugor arrestuan në flagrancë shtetasin J. L., 39 vjeç, banues në Bilisht, pasi u kap duke drejtuar automjetin në gjendje të dehur.
Nga Komisariati i Policisë Korçë u referuan materialet në Prokurori për shtetasin Gj. L., 27 vjeç, banues në Korçë, pasi dyshohet se në lagjen nr. 2 është konfliktuar fizikisht me shtetasin L. C., për motive të dobëta.
Gjithashtu, Komisariati i Policisë Pogradec referoi materialet në Prokurori për shtetasit I. M., 53 vjeç dhe S. T., 48 vjeçe, banues në Tiranë, për veprën penale “Mashtrimi”. Dyshohet se ata kanë marrë me qira dy automjete dhe nuk ia kanë kthyer pronarit, sipas kontratës.
Shërbimet e Komisariatit të Policisë Devoll referuan materialet në Prokurori dhe shpallën në kërkim shtetasin D. J., 54 vjeç, banues në fshatin Hoçisht. Gjatë kontrollit në banesën e tij u gjetën dhe u sekuestruan 9 granata dore (3 ofensive dhe 6 difensive), si dhe 8 ndezës të unifikuar. Vijon puna për kapjen e tij.
Po ashtu, nisi procedimi penal për shtetasin A. O., 49 vjeç, banues në Bilisht, pasi dyshohet se është konfliktuar fizikisht me shtetasin S. B., në një lokal në Bilisht.
Nga Komisariati i Policisë Maliq u referuan materialet në Prokurori për shtetasin G. Ll., banues në fshatin Tërovë, Maliq, pasi u konstatua duke kryer punime ndërtimi pa leje në një tokë të pushtuar prej tij.
Të gjitha materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë.
