Drejtoria Vendore e Policisë Korçë ka vijuar kontrollet dhe veprimet ligjore në disa zona të qarkut, duke arrestuar dy shtetas për drejtim automjeti në gjendje të dehur, si edhe duke referuar disa raste të tjera për procedim penal.
Specialistët e Sektorit të Qarkullimit Rrugor arrestuan në flagrancë shtetasin L. H., 20 vjeç, banues në fshatin Biranj, Korçë, pasi u kap duke drejtuar automjetin në gjendje të dehur. Po ashtu, në pranga ra edhe shtetasi I. D., 49 vjeç, banues në Pogradec, i cili u ndalua në lagjen nr. 2 të qytetit, gjithashtu duke drejtuar mjetin nën efektin e alkoolit.
Ndërkohë, materialet iu referuan Prokurorisë edhe për një 17-vjeçare nga Pogradeci, e cila u kap në aksin rrugor “Pogradec–Qafë Thanë” duke drejtuar automjetin pa leje drejtimi.
Në Korçë, Specialistët për Hetimin e Krimeve nisën procedim penal ndaj shtetasit S. E., 23 vjeç, banues në Yzberisht, Tiranë, pasi dyshohet se në gjendje të dehur ka thyer xhamin e derës hyrëse të Urgjencës së spitalit të Korçës.
Po ashtu, në Maliq, nisi procedimi penal për shtetasin A. K., 61 vjeç, banues në fshatin Orman-Pojan, i dyshuar për vetëgjyqësi, pasi ka punuar me mjet bujqësor një sipërfaqe toke për të cilën pretendohet pronësia edhe nga një shtetas tjetër.
Të gjitha materialet procedurale i janë referuar Prokurorisë së Korçës për veprime të mëtejshme ligjore.
