Strukturat e Drejtoria Vendore e Policisë Korçë kanë vijuar kontrollet dhe veprimet hetimore në të gjithë qarkun, duke goditur disa raste të shkeljeve të ligjit.
Specialistët e Qarkullimit Rrugor arrestuan në flagrancë një 38-vjeçar nga Durrësi, i kapur në aksin “Korçë–Ersekë” duke drejtuar automjetin në gjendje të dehur. Ndërkohë, nisi procedimi penal për një 43-vjeçar në aksin “Qafë Thanë–Pogradec”, për të njëjtën shkelje.
Po ashtu, një 17-vjeçar në bulevardin “Republika” në Korçë përplasi një automjet të parkuar dhe u largua nga vendi i aksidentit. Nga verifikimet rezultoi se ai drejtonte mjetin pa leje drejtimi.
Në fushën e hetimit të krimeve, një 23-vjeçar u arrestua pasi theu masën e sigurisë “arrest në shtëpi”, të caktuar nga Gjykata e Korçës për veprën penale “Prodhimi dhe shitja e narkotikëve”.
Gjithashtu:
- Një 68-vjeçare dyshohet se i ka vjedhur çantën një 34-vjeçareje në lagjen nr. 1, në Korçë. Policia gjeti një pjesë të parave dhe celularin e vjedhur në banesën e saj.
- Procedim penal nisi për dy shtetas, pasi një 18-vjeçar ishte punësuar në mënyrë të paligjshme dhe në celularin e tij u gjetën faqe bastesh sportive.
- Një 30-vjeçar në fshatin Belorta u kap duke kryer ndërtime pa leje.
Në fushën ekonomiko-financiare, një 50-vjeçar në fshatin Trestenik, Devoll, u procedua për kontrabandë, pasi transportonte bombola me gaz freon pa dokumentacion, pranë kufirit me Greqinë.
Në Devoll:
- Një 48-vjeçar dyshohet se ka kanosur me thikë një shtetas për motive të dobëta.
- Një 59-vjeçare u procedua pasi dyshohet se ka goditur me shuplakë një 46-vjeçare pas një konflikti.
Në Maliq:
- Një 36-vjeçare u procedua pasi dyshohet se nuk ka lejuar ish-bashkëshortin të takojë fëmijën, në kundërshtim me vendimin e gjykatës.
- Një 60-vjeçar nga Tirana u procedua për vetëgjyqësi, pasi pengonte kalimin në një pronë në fshatin Kakaç.
Ndërkohë, në fshatin Kreshovë të Kolonjës, një automjet u përfshi nga flakët. Sipas hetimeve paraprake, zjarri dyshohet të ketë rënë aksidentalisht si pasojë e një shkëndije elektrike.
Materialet i janë referuar Prokurorisë së Korçës për veprime të mëtejshme.
