Shërbimet e Sektorit të Qarkullimit Rrugor referuan materialet në Prokurori, ku filloi procedimi penal për shtetasin Xh. B., 30 vjeç, banues në fshatin Dvoran, Korçë. Në aksin rrugor “Pogradec–Korçë”, në afërsi të fshatit Buçimas, Pogradec, duke drejtuar automjetin, ai ka aksidentuar shtetasen E. M., 21 vjeçe, banuese në fshatin Buçimas, këmbësore në rrugë. E reja po merr mjekim në spitalin e Pogradecit dhe ndodhet jashtë rrezikut për jetën.
Specialistët për Hetimin e Krimeve të Komisariatit të Policisë Korçë referuan materialet në Prokurori, ku nisi procedimi penal për veprën penale “Përvetësimi i titullit apo i detyrës shtetërore” ndaj shtetasve R. V., 19 vjeç, banues në Tiranë dhe H. F., 24 vjeç, banues në Korçë. Në bulevardin “Republika”, Korçë, këta shtetas janë konstatuar duke u bërë shenjë automjeteve të ndalonin, me një tabelë me mbishkrimin “Drejtoria e Përgjithshme e Tatimeve, Kontrolli Tatimor”, e cila u sekuestrua në cilësinë e provës materiale.
Gjithashtu, nisi procedimi penal për veprën penale “Ndotja e ajrit, e ujërave dhe e tokës” për shtetasin M. H., 35 vjeç, banues në Korçë. Në lagjen nr. 18, ai u kap nga shërbimet e Patrullës së Përgjithshme duke djegur pajisje elektroshtëpiake të vjetra në terren të hapur, duke shkaktuar ndotje të ajrit.
Specialistët për Hetimin e Krimeve të Komisariatit të Policisë Devoll referuan materialet në Prokurori, ku nisi procedimi penal për shtetasin E. U., 25 vjeç, banues në fshatin Trestenik, Devoll, pasi dyshohet se ka ushtruar dhunë psikologjike ndaj bashkëjetueses së tij, e cila u pajis me urdhër mbrojtjeje.
Po ashtu, nisi procedimi penal për shtetasin D. M., 45 vjeç, banues në Tiranë, pasi në fshatin Gracë, Devoll, dyshohet se është konfliktuar fizikisht me shtetasen D. Gj., 70 vjeçe, për motive pronësie.
Në vijim të informacionit të datës 09.02.2026, lidhur me një konflikt të ndodhur në lagjen nr. 1, Pogradec, sot u paraqit në ambientet e Komisariatit të Policisë Pogradec shtetasi E. M., 28 vjeç, banues në Pogradec, i cili rezultonte i shpallur në kërkim për veprat penale “Plagosja e lehtë me dashje”, kryer në bashkëpunim, dhe “Shkatërrimi i pronës”. Pas konsultimit me Prokurorin e çështjes, 28-vjeçari do të ndiqet në gjendje të lirë.
Materialet procedurale iu referuan Prokurorisë së Korçës për veprime të mëtejshme.
