Disa ngjarje të ndryshme janë regjistruar në 24 orët e fundit në qarkun e Korçës, ku nuk kanë munguar rastet e dhunës në familje, drejtimi i automjeteve në gjendje të dehur dhe aksidentet rrugore.
Specialistët për Hetimin e Krimeve të Komisariatit të Policisë Kolonjë arrestuan në flagrancë një 48-vjeçar nga fshati Starje, pasi dyshohet se ka ushtruar dhunë psikologjike ndaj ish-bashkëshortes së tij, e cila është pajisur me urdhër mbrojtjeje. Sipas Policisë, i njëjti shtetas ka kundërshtuar edhe uniformat blu, duke i fyer dhe goditur ata gjatë shoqërimit në komisariat.
Ndërkohë, Policia Rrugore arrestoi një 31-vjeçar në Korçë, i cili u kap duke drejtuar mjetin në gjendje të dehur. Po ashtu, një tjetër drejtues automjeti në aksin “Bilisht-Miras” humbi kontrollin e mjetit dhe doli nga rruga. 38-vjeçari, i cili rezultoi gjithashtu në gjendje të dehur, mbeti i dëmtuar dhe ndodhet në spital jashtë rrezikut për jetën.
Në Pogradec, u procedua penalisht një 33-vjeçar për dhunë psikologjike ndaj bashkëshortes. Gjithashtu, dy shtetas në fshatin Bletas u përfshinë në një konflikt fizik për motive të dobëta brenda një lokali, ku njëri prej tyre theu xhamin e derës me grusht.
Në një tjetër zhvillim, në Devoll, një 26-vjeçar i raportuar më herët si i larguar nga banesa ku ishte strehuar, u gjet nga shërbimet dhe u rikthye në shtëpinë e tij në Bilisht, në bashkëpunim me shërbimet sociale.
Ndërsa në Maliq, një aksident rrugor i ndodhur në aksin “Korçë-Pogradec”, pranë fshatit Vloçisht, la të plagosur dy persona. Automjetet e drejtuara nga dy shtetas u përplasën, duke shkaktuar dëmtime për një drejtues mjeti dhe një pasagjere rreth 40 vjeçe. Të dy ndodhen në spital jashtë rrezikut për jetën.
Materialet procedurale për të gjitha rastet i janë referuar Prokurorisë së Korçës, ndërsa grupet hetimore vijojnë punën për zbardhjen e plotë të rrethanave.
