Sipërmarrësi shqiptar Xhevair Dervishi, i njohur për aktivitetin e tij në fushën e ndërtimit dhe investimeve në Greqi, është vlerësuar me çmimin “Shën Tereza” në spektaklin “Shën Tereza, Shqiptarja e Gjithë Botës”, organizuar nga Sokol Guga.
Ky vlerësim u jepet personaliteteve shqiptare që janë dalluar në fusha të ndryshme si biznesi, humanizmi, kultura dhe promovimi i vlerave shqiptare në arenën ndërkombëtare. Sipas organizatorëve, çmimi synon të nderojë shqiptarët që me suksesin dhe kontributin e tyre kanë ndikuar pozitivisht në komunitetet ku jetojnë dhe veprojnë, duke ngritur lart emrin e Shqipërisë.
Prej vitesh, Xhevair Dervishi ka ndërtuar një karrierë të suksesshme në Selanik, duke u shquar në sektorin e ndërtimit. Përmes aktivitetit të tij profesional, ai ka kontribuar në zhvillimin ekonomik dhe njëkohësisht ka shërbyer si një shembull i integrimit dhe suksesit të komunitetit shqiptar në Greqi.
Në motivacionin e vlerësimit u theksua se rrugëtimi i tij përfaqëson historinë e një sipërmarrësi që ka arritur sukses përmes punës së palodhur, këmbënguljes dhe respektit ndaj njerëzve. Bashkëpunëtorët dhe ata që e njohin nga afër e vlerësojnë për profesionalizmin, seriozitetin dhe korrektësinë në marrëdhëniet e punës.
Përtej aktivitetit në biznes, Dervishi është vlerësuar edhe për angazhimin e tij human dhe mbështetjen ndaj komunitetit shqiptar, duke u bërë një figurë e respektuar mes bashkatdhetarëve në shtetin helen.
Spektakli “Shën Tereza, Shqiptarja e Gjithë Botës” është konceptuar si një homazh për figurën e Nënë Terezës dhe promovon vlerat e humanizmit, solidaritetit dhe përkushtimit ndaj njerëzve. Çmimi që mban emrin e saj konsiderohet një nga vlerësimet që nderon shqiptarët e suksesshëm në diasporë, të cilët përmes punës dhe kontributit të tyre shërbejnë si frymëzim për brezat e rinj.
