Banorët e fshatit Tërovë kanë protestuar për problemet me ujin e pijshëm, i cili sipas tyre prej dy javësh është bërë i pakonsumueshëm.
Ata shprehen se uji ka erë shumë të rëndë, duke e bërë të pamundur jo vetëm konsumimin, por edhe përdorimin për gatim dhe larje.
Sipas banorëve, fshatrat Tërovë dhe Pendavinj, me rreth 1500 banorë, ndodhen prej javësh në këto kushte, çka i ka detyruar të blejnë ujë për konsum, duke rritur ndjeshëm shpenzimet, veçanërisht për familjet e moshuara dhe pensionistët.
“Kemi gati 3 javë që kemi probleme me ujin e pijshëm. Është një problem i vështirë dhe nuk i japim dot zgjidhje. Burimi është ndërtuar në vitin 1977, ndoshta shkak janë reshjet e shumta. Banorët po blejnë ujë, çfarë të bëjmë?”
“Ka dy javë që uji ka aromë të keqe. Për të gatuar jemi detyruar të blejmë ujë. Është e vështirë për çdo gjë, edhe rrobat kur i lajmë mbajnë erë të keqe.”
“Ujë kemi 24 orë, por prej 15 ditësh nuk pihet për shkak të erës së rëndë. Institucionet kompetente duhet të gjejnë zgjidhje. Ne blejmë ujë, por është kosto për ne, jemi pensionistë dhe nuk kemi mundësi tjetër.”
“Ka dy javë që uji mban erë të qelbur, të mbyt vetëm kur lan sytë. Gjendja është shumë e vështirë. Askush nuk bëhet merak për ne.”
Nga ana tjetër, drejtori i Agjencisë së Ujësjellës-Kanalizimeve Korçë, Petrit Tare, bëri me dije se janë kryer dy herë analizat e ujit të pijshëm në fshatrat Tërovë dhe Pendavinj, dhe sipas rezultateve të analizave, uji rezulton i konsumueshëm.
