Specialistët e Sektorit të Qarkullimit Rrugor arrestuan në flagrancë shtetasit B. J., 46 vjeç, E. M., 38 vjeç, dhe A. A., 58 vjeç, pasi u kapën duke drejtuar automjetet e tyre, në gjendje të dehur.
Gjithashtu, referuan materialet në Prokurori, ku filloi procedimi penal për shtetasit:
-B. R., 18 vjeç, banues në fshatin Gështenjas, pasi në aksin rrugor “Korçë-Pogradec”, duke drejtuar motomjetin, ka humbur kontrollin mbi drejtimin e tij dhe për pasojë motomjeti ka dalë nga rruga. Nga aksidenti është dëmtuar 18-vjeçari, i cili po merr ndihmë mjekësore në Spitalin e Traumës;
-një 15-vjeçar, pasi u kap duke drejtuar motomjetin, pa leje drejtimi.
Shërbimet e Komisariatit të Policsë Maliq referuan materialet në Prokurori dhe shpallën në kërkim shtetasin A. D., 24 vjeç, banues në Pojan, pasi dyshohet se ka ushtruar dhunë psikologjike ndaj babait të tij.
Gjithashtu, referuan materialet në Prokurori, ku filloi procedimi penal për shtetasin G. H., 69 vjeç, banues në fshatin Pojan, pasi dyshohet se i ka pushtuar një sipërfaqe toke një 57-vjeçareje.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
