Drejtoria Vendore e Policisë Korçë ka raportuar disa raste të evidentuara gjatë 24 orëve të fundit, që lidhen me shkelje të qarkullimit rrugor, përndjekje dhe konflikt fizik.
Specialistët e Sektorit të Qarkullimit Rrugor arrestuan në flagrancë shtetasin K. R., 41 vjeç, banues në fshatin Pojan, Maliq, pasi u kap në aksin rrugor “Zaroshkë-Pustec”, duke drejtuar një motomjet pa targë dhe pa leje drejtimi.
Ndërkohë, specialistët për Hetimin e Krimeve të Komisariatit të Policisë Korçë referuan materialet në Prokurori dhe shpallën në kërkim shtetasin B. R., 34 vjeç, banues në Korçë, i dyshuar për përndjekjen e një shtetasi tjetër. Policia po vijon punën për lokalizimin dhe kapjen e tij.
Po ashtu, specialistët për Hetimin e Krimeve të Komisariatit të Policisë Maliq nisën procedim penal ndaj shtetasit E. B., 45 vjeç, banues në fshatin Starovë, Pogradec, pasi dyshohet se gjatë një konflikti për motive të dobëta ka goditur me grusht një 27-vjeçar.
Materialet procedurale për të gjitha rastet i janë referuar Prokurorisë së Korçës për veprime të mëtejshme.
