Policia e Korçës ka vijuar kontrollet dhe veprimet procedurale në disa raste të evidentuara gjatë 24 orëve të fundit, duke arrestuar një shtetas dhe duke nisur procedime penale për disa të tjerë.
Specialistët e Sektorit të Qarkullimit Rrugor arrestuan në flagrancë shtetasin S. K., 35 vjeç, banues në Korçë, pasi u kap në lagjen nr. 16 duke drejtuar automjetin në gjendje të dehur.
Ndërkohë, specialistët për Hetimin e Krimeve të Komisariatit të Policisë Korçë referuan materialet në Prokurori, ku nisi procedimi penal për disa shtetas. Konkretisht, shtetasi N. N., 43 vjeç, banues në fshatin Boboshticë, dyshohet se gjatë një konflikti për motive të dobëta ka fyer dhe kanosur një 68-vjeçar.
Gjithashtu, shtetasi V. D., 46 vjeç, banues në Korçë, është proceduar pasi në ambientet e Prokurorisë së Korçës ka prishur qetësinë dhe ka kundërshtuar punonjësin e policisë private për shkak të detyrës.
Në një tjetër rast, shtetasi M. B., 67 vjeç, banues në Korçë, dyshohet se ka goditur me send të fortë një 39-vjeçar, i cili ka marrë dëmtime të lehta.
Po ashtu, specialistët për Hetimin e Krimeve të Komisariatit të Policisë Maliq referuan materialet në Prokurori për shtetasin K. M., 30 vjeç, banues në fshatin Pocestë, i cili dyshohet se ka goditur me grusht një 38-vjeçar për motive të dobëta.
Materialet procedurale i janë referuar Prokurorisë së Korçës për veprime të mëtejshme.
