Angela Nika – Vajza Korçare që Po Shkëlqen në Futboll dhe Po Frymëzon Gjeneratën e Re
Nga rrugicat e qytetit të Korçës drejt fushave kombëtare të futbollit, Angela Nika është shembulli i vajzës shqiptare që me pasion, disiplinë dhe këmbëngulje, po ndërton një karrierë të shkëlqyer në sportin që dashuron.
Angela nisi rrugëtimin e saj futbollistik në moshën 13-vjeçare, duke u bërë pjesë e KF Skënderbeu, ku për tre vite tregoi talentin dhe përkushtimin e saj. Pas një eksperience njëvjeçare me KF Tirana, sot ajo është pjesë e KF Gramsh, ku vazhdon të rritet si sportiste dhe të bëhet një emër i njohur në futbollin e femrave.
Në moshën 14-vjeçare, Angela përjetoi një nga momentet më të rëndësishme të jetës së saj: ftesa për në Kombëtaren Shqiptare. Ky ishte fillimi i një kapitulli të ri për të, që e çoi drejt përfaqësimit të vendit në grupmoshat U16, U17 dhe U19, dhe së fundmi në Kombëtaren A të Femrave, një arritje që konfirmon talentin dhe seriozitetin e saj në këtë sport.
“Karriera ime nuk ka qenë e lehtë, por me stërvitje intensive, forcë, shpresë dhe duke mos abuzuar me asnjë mundësi, mendoj se puna ime ka filluar të njihet”, – thotë Angela, e cila është vlerësuar si kandidate për Talentin e Vitit në ceremoninë e Topit të Artë.
Përveç arritjeve në fushë, Angela ka qenë shpesh e ftuar në media kombëtare si Ora News, RTSH dhe MCN, ku ka folur për zhvillimin e futbollit të femrave, rolin e FSHF-së dhe rëndësinë e mbështetjes për vajzat që duan të ndjekin një karrierë sportive. Ajo është bërë një zë i rëndësishëm për të rinjtë, sidomos për vajzat që ëndërrojnë të ndjekin pasionin e tyre në një fushë që dikur konsiderohej vetëm për meshkuj.
Sot, Angela Nika nuk është vetëm një lojtare e talentuar. Ajo është një model për këmbënguljen, përkushtimin dhe besimin që çdo ëndërr mund të bëhet realitet, nëse punon fort për të. Dhe për këtë, futbolli shqiptar ka shumë arsye për të qenë krenar.
