Rreth 60 të burgosur në Institucionin e Ekzekutimit të Vendimeve Penale në Drenovë pritet të fitojnë lirinë si rezultat i zbatimit të ligjit për dhënien e amnistisë penale, i cili do të nisë të zbatohet më 15 korrik.
Përveç lirimit të një pjese të të dënuarve, ligji parashikon edhe ulje të dënimit për kategori të tjera përfituese. Konkretisht, të dënuarve burra do t’u ulet dënimi me 1 vit, ndërsa të dënuarave gra me 1 vit e 6 muaj.
Nga përfitimet e amnistisë përjashtohen personat që janë subjekt i hetimeve ose procedimeve të Prokurorisë së Posaçme Kundër Korrupsionit dhe Krimit të Organizuar (SPAK), si edhe të dënuarit për vepra penale me rrezikshmëri të lartë.
Procesi i zbatimit të amnistisë pritet të përfundojë gjatë ditës së 15 korrikut, pas verifikimit të dosjeve të personave që plotësojnë kriteret ligjore.
