Tradita, puna dhe prodhimi vendas u festuan në fshatin Drithas të Maliqit, në “Festën e Bukës së Re”.
Banorët u mblodhën për të shënuar përfundimin e korrjeve dhe prodhimin e grurit, një prej kulturave më të rëndësishme të zonës.
Në tryezat e festës nuk munguan gatimet tradicionale të përgatitura nga gratë e fshatit, me produkte vendase. Festa shërbeu edhe si një mundësi për të bashkuar familjet dhe emigrantët që rikthehen në vendlindje gjatë muajve të verës.
Për banorët e Drithasit, kjo traditë lidhet me historinë dhe jetën e fshatit, ndërsa rikthimi i emigrantëve i jep festës një tjetër dimension, duke afruar brezat me vendlindjen dhe rrënjët e tyre.
Këngët dhe vallet tradicionale krijuan atmosferën festive, ndërsa “Festa e Bukës së Re” përcolli mesazhin e vlerësimit për punën e fermerëve dhe prodhimin vendas.
Festa, e kthyer tashmë në një traditë të zonës, synon të mbajë gjallë zakonet e trashëguara ndër breza dhe të bashkojë komunitetin rreth tokës, bukës dhe traditave.
