Dy persona janë arrestuar në Korçë, pasi u kapën në flagrancë duke transportuar kundrejt pagesës 28 shtetas sudanezë, të cilët synonin të kalonin ilegalisht kufirin drejt Malit të Zi.
Operacioni i koduar “Route” u finalizua nga Shërbimet e Policisë Kufitare Korçë. Në pranga ranë J. M., 42 vjeç, banues në Korçë, dhe E. D., 31 vjeç, banues në Belortë, Maliq. Ky i fundit rezulton se ishte me masën e sigurisë “Arrest në shtëpi”.
Të dy u kapën në fshatin Plasë, ku kishin grumbulluar emigrantët dhe po i transportonin në grupe drejt veriut të vendit, me destinacion final kalimin ilegal në Malin e Zi.
Gjatë operacionit u sekuestruan një automjet, 6500 euro dhe 3 telefona celularë.
Materialet procedurale i kaluan Prokurorisë së Korçës për veprime të mëtejshme.
