Skënderbeu vijon të japë sinjale pozitive në fazën përgatitore, teksa ka mposhtur Kukësin me rezultatin 2-1 në ndeshjen miqësore të zhvilluar në aneksin e stadiumit “Skënderbeu”. Korçarët siguruan fitoren falë një pjese të dytë më bindëse, ku protagonist u bë Enur Totre.
45 minutat e para u mbyllën pa gola, megjithëse Skënderbeu pati mundësinë të kalonte në avantazh nga pika e bardhë. Mesfushori Braga ekzekutoi penalltinë e fituar nga Veliçkovski, por portieri Amarildo Dervishaj reagoi saktë duke pritur goditjen.
Në pjesën e dytë, hyrja e Totres ndryshoi ritmin e lojës. Fillimisht, në minutën e 52-të, ai asistoi për Shaqen, i cili shënoi me kokë golin e avantazhit. Vetëm 11 minuta më pas, një tjetër aksion i nisur nga Totre u finalizua nga Veliçkovski për rezultatin 2-0. Kukësi reagoi me Demirçanin, i cili ngushtoi diferencën pas një gabimi në mbrojtjen korçare, por nuk arriti të shmangte humbjen.
Fitorja ndaj Kukësit përbën një tjetër test pozitiv për skuadrën e Ivan Ahmatajt në prag të nisjes së sezonit të ri, ndërsa paraqitja e Enur Totres dhe pritja e penalltisë nga Dervishaj ishin momentet më të spikatura të sfidës.
