Strelca, një nga fshatrat më të njohur të krahinës së Gorës, po përjeton një ringjallje falë zhvillimit të turizmit dhe investimeve të banorëve që po rikthehen në vendlindje. Vetëm 25 kilometra larg Maliqit, fshati dikur kishte mbi 300 shtëpi dhe më shumë se 1.400 banorë, ndërsa sot numëron rreth 60 familje me afro 240 banorë.
Një prej investitorëve është Erjon Kapedani, i cili, megjithëse i lindur dhe rritur në Tiranë, ka zgjedhur të investojë në tokën e të parëve. Fillimisht ai ndërtoi një banesë për të atin, ndërsa më pas ngriti një resort turistik që sot mirëpret vizitorë nga vende të ndryshme të Evropës.
Sipas Kapedanit, gjatë sezonit turistik pjesa më e madhe e vizitorëve janë të huaj, të cilët zgjedhin Strelcën për natyrën, ecjet në mal, liqenet dhe eksperiencat autentike që ofron zona. Ai shprehet optimist se investime të tilla do të kontribuojnë në rikthimin e jetës në fshat.
Përshtypje pozitive kanë edhe turistët e huaj. Një vizitore nga Belgjika e cilëson Strelcën si një nga vendet më të bukura që ka vizituar, duke vlerësuar mikpritjen e banorëve dhe gatimet tradicionale shqiptare. Ndërsa një turist tjetër e përshkruan zonën si një destinacion fantastik me njerëz të mrekullueshëm dhe natyrë mbresëlënëse.
Njësia Administrative Gorë përfshin 16 fshatra, të cilët vitet e fundit po tërheqin gjithnjë e më shumë turistë vendas dhe të huaj, veçanërisht ata që preferojnë turizmin e aventurës dhe natyrës. Investimet në këtë zonë po e shndërrojnë Gorën në një nga destinacionet më premtuese turistike të juglindjes së Shqipërisë.
