Ish-deputeti i Partisë Demokratike për qarkun e Korçës, Hekuran Hoxhalli, sot është pronar i tre kompanive që operojnë në fushën e ndërtimit dhe konsulencës, HMK Consulting, 2H Construction dhe Tekna Chem Albania, të cilat kanë përfituar fonde publike dhe kanë marrë pjesë në procedura tenderimi me institucionet shtetërore.
Ndërkohë, një nga investimet që ka shkaktuar reagim të fortë publik është ai i ujësjellësit të fshatit Zvezdë në Bashkinë Maliq. Banorët kanë dalë sërish në protestë, duke deklaruar se pavarësisht investimit prej mbi 600 mijë eurosh, në çezmat e tyre nuk ka ende ujë të pijshëm.
“600 mijë euro ikën kot. Ujësjellësi u ndërtua, por ujë nuk kemi”, shprehen banorët, të cilët kërkojnë hetim dhe transparencë për mënyrën se si janë shpenzuar fondet publike. Ata thonë se projekti, i cili duhej të përfundonte brenda 7 muajve, është zvarritur për më shumë se një vit dhe nuk ka sjellë asnjë përmirësim në jetën e tyre të përditshme.
Banorët e Zvezdës deklarojnë se vazhdojnë të mbushin ujë me bidona në orët e para të mëngjesit, ndërsa një investim që duhej t’i jepte fund një problemi 30-vjeçar, sipas tyre, ka mbetur vetëm në letër.
Ata kërkojnë që institucionet përgjegjëse të japin shpjegime se ku kanë shkuar paratë publike dhe përse, pas një investimi kaq të madh, fshati vijon të mbetet pa ujë të pijshëm.
