Pogradeci u kthye këtë fundjavë në qendrën e atletikës ndërkombëtare, ku mbi 550 atletë amatorë dhe profesionistë nga 40 vende të botës morën pjesë në edicionin e pestë të Enkelana Marathon.
Maratona u zhvillua në dy disiplina, 21 dhe 11 kilometra, duke bërë bashkë pjesëmarrës nga mosha 15 deri mbi 60 vjeç. Pjesëmarrja e gjerë dëshmoi edhe një herë se sporti dhe stili i shëndetshëm i jetesës nuk njohin kufij moshe. Edhe këtë vit, atletët nga Kosova spikatën me rezultate të shkëlqyera.
Në garën e 21 kilometrave, fitues për meshkuj u shpall Timon Mamusha, ndërsa në kategorinë e femrave triumfoi Gresa Bakraqi. Të dy vlerësuan organizimin e aktivitetit dhe theksuan se Enkelana Marathon po rritet çdo vit, duke fituar gjithnjë e më shumë prestigj në arenën ndërkombëtare.
Në garën e 11 kilometrave, vendin e parë për meshkuj e fitoi Albert Abazi nga Kërçova, ndërsa për femra triumfoi Kristina Pura nga Prrenjasi, e cila mbrojti titullin kampion për të dytin vit radhazi.
Maratona mblodhi sportdashës nga vende të ndryshme si Shtetet e Bashkuara të Amerikës, Suedia, Rusia, Greqia, Japonia dhe shumë shtete të tjera. Pjesëmarrësit u shprehën të impresionuar nga bukuritë natyrore të liqenit të Ohrit, mikpritja pogradecare dhe organizimi i aktivitetit, duke theksuar se do të rikthehen sërish në edicionet e ardhshme.
Enkelana Marathon është vlerësuar nga Ministria e Ekonomisë, Kulturës dhe Inovacionit me çmimin e parë si një nga eventet sportive më të mira në Shqipëri. Organizatorët kanë konfirmuar gjithashtu se aktiviteti do të vazhdojë të zhvillohet në Pogradec edhe për pesë vitet e ardhshme, duke forcuar më tej pozicionin e qytetit si një destinacion i rëndësishëm i turizmit sportiv.
