Pogradeci po përjeton një nga sezonet verore më të suksesshme të viteve të fundit, me një fluks të lartë pushuesish vendas dhe të huaj. Sipas të dhënave zyrtare, kërkesa për të vizituar dhe pushuar në qytetin liqenor është rritur ndjeshëm, ndërsa korriku ka sjellë një bum vizitorësh që kanë zgjedhur Pogradecin për klimën e freskët, pastërtinë dhe shërbimet turistike.
Pushuesit shprehen të kënaqur me kushtet që ofron qyteti, duke vlerësuar investimet e bëra në plazhe, çadrat publike dhe mirëmbajtjen e hapësirave. Shumë prej tyre rikthehen çdo verë, ndërsa të tjerë theksojnë se, pavarësisht nevojës për përmirësime të mëtejshme, Pogradeci mbetet një nga destinacionet e tyre të preferuara.
Sipas drejtorit të Turizmit në Bashkinë Pogradec, Ledian Zeqollari, trendi i këtij sezoni është shumë pozitiv. Ai thekson se, përveç liqenit dhe klimës, turistët po tregojnë gjithnjë e më shumë interes për atraksionet kulturore, historike dhe natyrore të zonës.
Bazilika e Linit, qyteti i Pogradecit dhe destinacione të tjera të juglindjes janë ndër pikat më të vizituara, ndërsa turistët që frekuentojnë më shumë zyrën e informacionit turistik vijnë nga vende si Franca, Gjermania, Shtetet e Bashkuara, Polonia dhe Çekia. Sipas Zeqollarit, është rritur ndjeshëm edhe interesi për turizmin historik dhe atë kulinar.
Me liqenin, klimën e favorshme, temperaturat e këndshme, hapësirat në plazhe dhe çmimet e përballueshme, Pogradeci pritet të njohë një fluks edhe më të madh vizitorësh gjatë muajit gusht, duke konfirmuar edhe këtë verë statusin si një nga destinacionet më të preferuara turistike në juglindje të vendit.
