Pavijoni i Onkologjisë në Spitalin Rajonal të Korçës është pajisur me aparatura dhe mjete të reja mjekësore falë donacioneve të ardhura nga diaspora shqiptare në Shtetet e Bashkuara të Amerikës.
Shoqata “Albanian Fighting Cancer USA”, e cila prej më shumë se gjashtë vitesh mbështet spitalet shqiptare me pajisje mjekësore, ka realizuar edhe këtë vit një tjetër donacion të rëndësishëm për spitalin e Korçës, duke kontribuar në përmirësimin e kushteve për trajtimin e pacientëve me sëmundje tumorale.
Përfaqësuesja e shoqatës, Roberta Panariti, u shpreh se organizata ka dhuruar pajisje në disa spitale të vendit, ndërsa tashmë është kompletuar edhe pavijoni i Onkologjisë në Korçë.
Sipas saj, të gjitha ndihmat vijnë nga shqiptarë që jetojnë në SHBA dhe kanë si mision mbështetjen e pacientëve me kancer dhe përmirësimin e shërbimit shëndetësor në Shqipëri.
Një nga donatoret, filantropja Fotini Kokeri, tha se vendosi të ndihmojë spitalet shqiptare pasi pa nga afër nevojat e mëdha që kanë për pajisje. Ajo bëri të ditur se ka dhuruar personalisht mbi 350 mijë dollarë, ndërsa së bashku me donatorë të tjerë kanë sjellë edhe donacione të konsiderueshme në vitet e fundit.
Përfaqësuesit e shoqatës theksuan se mbështetja për spitalet shqiptare do të vazhdojë edhe në të ardhmen, me synimin për të përmirësuar kushtet e trajtimit dhe për t’u ardhur në ndihmë sa më shumë pacientëve që përballen me sëmundjet tumorale.
