Pedonalja e qytetit të Bilishtit u mbush me atmosferë festive në mbrëmjen tradicionale të maturës, një aktivitet i organizuar prej vitesh nga Bashkia Devoll për të uruar maturantët në përfundim të një prej etapave më të rëndësishme të jetës së tyre.
Në këtë mbrëmje të veçantë morën pjesë maturantët e gjimnazit “Fuat Babani”, familjarë, miq dhe qindra qytetarë të cilët iu bashkuan festës së të rinjve. Aktiviteti nisi me paradën e maturantëve përgjatë pedonales së Bilishtit, ku të rinjtë të veshur me elegancë u përshëndetën nga të pranishmit.
Festa vijoi me muzikë, kërcime dhe momente argëtimi, ndërsa i ftuari special i mbrëmjes, këngëtari Gena Lito, solli një atmosferë të veçantë përmes performancës së tij.
Drejtori i gjimnazit “Fuat Babani”, Eduart Begolli, e vlerësoi këtë organizim si një traditë të rëndësishme që motivon nxënësit dhe u lë atyre kujtime të bukura nga vitet e shkollës së mesme.
“Festa është në vazhdën e traditës që është krijuar në Devoll, një ditë e tillë me rastin e përfundimit të vitit shkollor. Për të nxitur nxënësit që të kenë arritje më të mira në mësime, Bashkia Devoll organizon një festë të tillë që të krijohet atmosferë, por njëkohësisht edhe nxënësit të mbajnë mend një kujtim të bukur nga vitet e gjimnazit”, u shpreh Begolli.
Emocionet e kësaj nate u përcollën edhe nga vetë maturantët. Në emër të bashkëmoshatarëve të saj, Emilia Gjata falënderoi mësuesit dhe shkollën për vitet e kaluara së bashku, duke e cilësuar gjimnazin si një vend ku ata morën jo vetëm dije, por edhe vlera për jetën.
Mbrëmja e maturës u shndërrua në një festë për të gjithë qytetin e Bilishtit, ku muzika, emocionet dhe gëzimi shoqëruan maturantët deri në orët e vona. Kjo natë shënoi për ta mbylljen e një kapitulli të rëndësishëm dhe nisjen e një rrugëtimi të ri drejt ëndrrave dhe sfidave të së ardhmes.
