Ish-deputeti demokrat, Edmond Spaho ka reaguar sërish lidhur me protestat qytetare kundër qëverisë, përmes së cilave kërkohet edhe dorëheqja e kryeministrit Edi Rama.
Përmes një postimi në rrjetet sociale, Spaho i drejtohet drejtpërdrejtë Ramës, teksa shprehet me se i ka bërë shumë dëme shqiptarëve, megjithatë argumenton se dëmi më i madh do të ishte nëse kryeministri do të dorëhiqej.
Sipas Spahos, synimi i vetëm i protestave që zhvillohen prej rreth një muaji në vend është ta kthejë vendin një shekull prapa.
Reagimi i plotë:
Edi Rama,
Kjo nuk është protestë për të lëpirë dhe pickuar vajza e djem të sinqertë në bulevard.
Këtij populli i ke bërë deme të pafund. Në një vend me shoqëri me formim demokratik do kishe ikur me kohë.
Dëmi më i madh që do i bëje ketij vendi nuk janë e shkuara jote, por nëse do të ikje nga presioni i kësaj proteste neomarksiste, islamisto-fondamentaliste, antitrampiste, përçarëse midis shqiptarëve në rajon dhe kunder integrimit të Shqipërisë në BE.
Kujto që dëmi që do i besh vendit, duke e lënë atë në duart e atyre që duan ta zgjedhin qeverinë me short dhe hienave politike që presin të kapin çfarë të kapin, do jetë i tillë që ti nuk do i shpëtosh përgjegjësisë edhe kur ndoshta të mos jesh në këtë botë.
Meqënëse po flet për sinqeritet në bulevard, kujto ëndrat-makth të personazhit të Kadaresë tek Dimri i Vetmisë së Madhe.
Nëse çedon, mos u habit që mund të vijë një ditë që eshtrat e tua t’i tërheqin zvarre në bulevard si në endrrat e atij “reaksionarit”.
Në krye te bulevardit ndonjëtrashegimtar i Mark Zavalines do i bjerë violinës.
Duket si fantazi e sëmurë, por ata që janë të interesuar që ky vend të bëje përpara dhe jo pas, nuk do ta falin nëse çedon nga kjo protestë, synimi i të cilës është ta kthejë vendin një shekull prapa.
