Në kuadër të çeljes së sezonit turistik në qytetin e Pogradecit, ministri i Turizmit dhe Kulturës, Blendi Gonxhe, zhvilloi këtë të enjte një sërë takimesh me përfaqësues të biznesit dhe aktorë të sektorit turistik.
Për të mbërritur në qytetin liqenor, ministri zgjodhi një mënyrë të veçantë udhëtimi, duke udhëtuar me një hidroplan (seaplane), një iniciativë që synon promovimin e sporteve ujore dhe potencialit turistik të zonës.
“Ishte shumë qejf”, u shpreh Gonxhe menjëherë pas uljes në liqen.
Gjatë takimit me bizneset lokale, ministri theksoi simbolikën e kësaj mbërritjeje, duke kujtuar se avionët e vegjël që ulen në ujë në Shqipëri zakonisht shihen gjatë operacioneve për shuarjen e zjarreve.
“Kjo është hera e parë që një avion i tillë zbret për qejf dhe jo për hall”, tha ai, duke nënvizuar rëndësinë e zhvillimit të turizmit dhe aktiviteteve rekreative në zonën e Pogradecit.
Vizita e ministrit vjen në prag të sezonit veror, ku Pogradeci mbetet një nga destinacionet më të preferuara për turistët vendas dhe të huaj.
