Interesi i të rinjve për arsimin profesional në juglindje po vjen në rritje nga viti në vit. Numri i aplikimeve për regjistrim në shkollën teknike profesionale në Korçë është shtuar, ndërsa drejtuesit e institucionit thonë se të rinjtë po e shohin zanatin si një mundësi konkrete për t’u afruar me tregun e punës.
Drejtoresha e shkollës profesionale, Anxhela Taho, thekson se arsimi profesional ofron jo vetëm përgatitje praktike, por edhe mbështetje financiare për nxënësit.
“Shohim një rritje nga viti në vit për arsimin profesional. Janë drejtime që shkojnë drejt tregut të punës. Të gjithë të rinjtë që zgjedhin arsimin profesional kanë disa përfitime; librat falas, pagesë transporti për ata që vijnë nga larg, si dhe bursë për personat me aftësi të kufizuara dhe familjet në nevojë. Sot kemi nevojë për profesionistë, elektricistë e hidraulikë”, u shpreh Taho.
Një prej nxënësve të kësaj shkolle, Andri Shali, tregon se falë arsimit profesional ka nisur punën ende pa përfunduar studimet.
“Jam në vit të fundit. Edhe studioj, edhe punoj me ashensorët. Bazat elektrike i kam marrë në shkollë dhe e kam pasur më të lehtë. Me një zanat, që në vit të dytë futesh në biznese dhe ambientohesh me punën”, tha ai.
Në një kohë kur shumë kompani në Shqipëri përballen me mungesë profesionistësh, arsimi profesional po shihet gjithnjë e më shumë si një urë lidhëse mes të rinjve dhe tregut të punës.
