Një operacion i koordinuar pas disa muajsh hetime proaktive nga Prokuroria pranë Gjykatës së Shkallës së Parë të Juridiksionit të Përgjithshëm Korçë ka çuar në zbulimin e një skeme të mirëorganizuar kontrabande mallrash nga Greqia drejt Shqipërisë dhe arrestimin e katër personave të përfshirë.
Në kuadër të procedimit penal nr.438 të vitit 2026, pas informacioneve të siguruara nga Drejtoria Vendore për Kufirin dhe Migracionin Korçë, autoritetet dokumentuan përmes vëzhgimeve të fshehta, monitorimeve dhe teknikave speciale hetimore aktivitetin kriminal të shtetasve me iniciale V.N. dhe A.N., të cilët në bashkëpunim me persona të tjerë organizonin futjen e paligjshme të konfeksioneve në territorin shqiptar.
Sipas hetimeve, organizatorët udhëtonin drejt Greqisë me automjete të modifikuara posaçërisht, duke hequr sediljet e pasme për të rritur kapacitetin transportues. Mallrat siguroheshin në shtetin grek, liheshin pranë vijës kufitare dhe më pas futeshin në Shqipëri përmes kufirit të gjelbër nga bashkëpunëtorë të tjerë. Pas transportimit në Korçë, mallrat magazinoheshin dhe hidheshin në treg përmes subjektit tregtar të administruar nga të dyshuarit.
Në përfundim të operacionit, u arrestuan shtetasit V.N., A.N., A.L. dhe S.N., të cilët u kapën në flagrancë gjatë shkarkimit të mallrave të dyshuara kontrabandë në një magazinë në qytetin e Korçës.
Gjatë ndërhyrjes, autoritetet sekuestruan 15 thasë me 1632 copë konfeksione, 73 thasë të tjerë me mallra rifuxho me peshë totale 1357 kg, automjete të përdorura për transportin e mallrave, përfshirë mjete të modifikuara, si dhe aparate celularë dhe dokumentacion që lidhet me aktivitetin kriminal.
Katër të arrestuarit po hetohen për veprat penale “Kontrabanda me mallra të tjera”, “Tregtimi dhe transportimi i mallrave që janë kontrabandë” dhe “Ruajtja ose depozitimi i mallrave kontrabandë”, ndërsa hetimet vijojnë për identifikimin e personave të tjerë të përfshirë në këtë rrjet.
