Drejtoria Vendore e Policisë Korçë ka raportuar disa ngjarje të ndryshme, ku një 55-vjeçar nga fshati Cangonj i Devollit është proceduar penalisht pasi, duke drejtuar një traktor pa targë dhe pa leje drejtimi në tokat bujqësore të fshatit, dyshohet se ka humbur kontrollin dhe ka rënë në një kanal. Si pasojë, drejtuesi ka mbetur i dëmtuar dhe ndodhet në spital jashtë rrezikut për jetën.
Ndërkohë, specialistët për Hetimin e Krimeve në Komisariatin e Policisë Korçë kanë shpallur në kërkim një 21-vjeçar nga fshati Shalës, Sarandë, i dyshuar për përndjekjen e një 21-vjeçareje përmes rrjeteve sociale, ndërsa vijon puna për kapjen e tij.
Po ashtu, nisi procedim penal edhe për një 58-vjeçar, banues në Korçë dhe rezident në SHBA, i cili dyshohet se në lagjen nr. 7 ka ndërruar bravën e derës së banesës së kunatës së tij dhe ka nxjerrë disa orendi jashtë, për shkak të një konflikti mbi pronësinë.
Të gjitha materialet procedurale i janë referuar Prokurorisë së Korçës për veprime të mëtejshme.
