Policia Kufitare e Korçës ka intensifikuar kontrollet në pikën kufitare të Kapshticës, duke goditur një tjetër rast kontrabande me mallra të ndryshme të futura nga Greqia pa dokumentacionin përkatës.
Gjatë kontrolleve të ushtruara nga shërbimet e Drejtorisë Vendore për Kufirin dhe Migracionin Korçë, në bashkëpunim me Degën Doganore Kapshticë, në vijën e dytë të kontrollit u ndalua një autobus ku udhëtonte si pasagjer shtetasi M. C., 42 vjeç, banues në Korçë.
Nga verifikimet në bagazhet e tij, uniformat blu konstatuan një sasi mallrash të dyshuara të kontrabanduara, përfshirë këpucë, konfeksione dhe aksesorë rrobaqepësie, të cilat nuk ishin deklaruar pranë autoriteteve doganore.
E gjithë sasia e mallrave u sekuestrua në cilësinë e provës materiale, ndërsa 42-vjeçari u vu në pranga në flagrancë për veprën penale “Kontrabanda me mallra të tjera”.
Materialet procedurale i kaluan Prokurorisë së Korçës për veprime të mëtejshme, ndërsa kontrollet në kufi vijojnë me fokus parandalimin dhe goditjen e paligjshmërive.
