Qarku i Korçës është përfshirë nga një seri ngjarjesh të rënda gjatë orëve të fundit, ku nuk kanë munguar aksidentet rrugore, plagosjet me thikë, konfliktet fizike dhe rastet e dhunës në familje.
Në aksin “Korçë-Progër”, një motokarro doli nga rruga pasi drejtuesi, shtetasi Dh. V., dyshohet se humbi kontrollin mbi mjetin. Si pasojë, ai dhe pasagjeri N. Sh. mbetën të plagosur dhe po marrin trajtim në spital.
Ngjarja më e rëndë u regjistrua në Pogradec, ku 63-vjeçari R. M. u arrestua pasi dyshohet se për motive të dobëta goditi me thikë një 44-vjeçar në lagjen nr.1. I plagosuri ndodhet në spital jashtë rrezikut për jetën. Në këtë çështje u procedua edhe një 35-vjeçare, e dyshuar për fshehjen e armës së krimit.
Po në Pogradec, dy të rinj u proceduan pasi në Buçimas dhunuan me grushte dhe sende të forta një 31-vjeçar, duke i shkatërruar edhe automjetin, ndërsa një 21-vjeçare u hetua për dhunë ndaj nënës së bashkëjetuesit.
Në Kolonjë, një 61-vjeçare përfundoi nën hetim pasi akuzohet për shqetësim me telefon dhe zaptim të paligjshëm të një pjese banese, duke pretenduar pronësinë mbi të.
Edhe në Korçë u evidentuan raste problematike, ku një 34-vjeçar shkeli urdhrin e mbrojtjes duke hyrë në banesën e të atit, ndërsa në Vinçan një tjetër shtetas akuzohet se goditi me shkop një 64-vjeçar pas një konflikti për motive të dobëta.
Të gjitha materialet janë referuar në Prokurorinë e Korçës, ndërsa autoritetet vijojnë hetimet për secilin rast.
