Një aksident rrugor i shkaktuar nga drejtimi i automjetit në gjendje të dehur, raste dhune në familje, kanosje me armë gjahu pa leje dhe plagosja e një vajze 5-vjeçare janë ngjarjet kryesore të raportuara nga Drejtoria Vendore e Policisë Korçë gjatë 24 orëve të fundit.
Në aksin rrugor “Pogradec-Qafë Thanë”, shtetasi J. B., 66 vjeç, banues në Tiranë, dyshohet se humbi kontrollin e automjetit ndërsa drejtonte në gjendje të dehur, duke dalë nga rruga. Si pasojë, ai mbeti i dëmtuar dhe po merr trajtim në spital, jashtë rrezikut për jetën.
Në Korçë, një 17-vjeçare po procedohet penalisht pasi dyshohet se ushtroi dhunë fizike ndaj gjyshes së saj, e cila u pajis me urdhër mbrojtjeje.
Në Maliq, shtetasi J. Sh. u procedua penalisht pasi dyshohet se kanosi fqinjin me armë gjahu pa leje, e cila u sekuestrua nga policia.
Ndërkohë, në Pogradec, një vajzë 5-vjeçare u transportua fillimisht në spitalin lokal dhe më pas në Spitalin e Traumës, pasi sipas familjarëve ishte rrëzuar aksidentalisht nga një karrige në banesë.
Të gjitha materialet procedurale janë referuar në Prokurorinë e Korçës për veprime të mëtejshme.
